Draejt oe is umme... Barchem in olde foto's en ansichten

Draejt oe is umme... Barchem in olde foto's en ansichten

Auteur
:   J. Bosch
Gemeente
:   Lochem
Provincie
:   Gelderland
Land
:   Nederland
ISBN13
:   978-90-288-5755-1
Pagina's
:   80
Prijs
:   EUR 16.95 Incl BTW *

Levertijd: 2 - 3 werkdagen (onder voorbehoud). Het getoonde omslag kan afwijken.

   


Fragmenten uit het boek 'Draejt oe is umme... Barchem in olde foto's en ansichten'

<<  |  <  |  1  |  2  |  3  |  4  |  5  |  6  |  7  |  8  |  >  |  >>

11. In veurige beukskes is al uutvoerig beschreven, dat hotel Meilink in de wieje umtrek bekend ston as 'n good hotel. Dus daor wo'k ut dan ok neet oaver hebben.

Mien herinnering geet terugge naor september 1944 "Dolle Dinsdag". De Duutsers hadden 'n slag urn Arnhem ewonnen.

De Duutse soldaoten, dee in Barchem bie de beide hotels, schole, Heidehof, Woodbrookers, enz. waren in-ekwartierd en dee ok hadden met-evochten bie Arnhem, kwammen terugge van ut oorlogsgeweld.

De oaverwinning, een van de leste stoeptrekkingen, mos evierd wodden en menig flesse "schnaps" ging d'r deur.

Bie hotel Meilink ston an de oaverkaante van de weg in 'n tuin, 'n tank op-steld met'n loop op Zwiep an. As onderdeel van de feestvreugde schotten de Duutsers met dat kanon op loage flesse. Wiej as kinder stonden d'r bie te kieken met de vingers in de oren, want ut pleerden gruweluk hard.

Too mos d'r deur de feestvierders nog 'n rit met 'n tank e'maakt wodden, met meer as tien man stonden ze boavenop ut gevaarte. En zo hard as dat ding maor riejen wol, ging dat de Lochemseweg op.

Ie mot wal stuiter dikke wen, as ie daor op wilt blieven staon.

12. Ai'j op ut darp stonden, kek ie zo in de smederieje van Greutink. Ie zagen ut veur branden en heurden de geluuden van de iezers, dee esmeed wodden as ze heite waren. As kinder mogge wiej daor geerne rondsneujen en wiej gingen vake kieken as d'r 'n peerd zo'n gleujend iezer onder de veute kreeg. Oaver ut he le darp hing dan zo'n aparten branderigen loch, den veural met warme dage 'n tied bleef hangen. Naost de smederieje had Greutink too ok al 'n winkel, maor den was neet zo uutgebreid as den van zien opvolger, Arie Roessink, urn maor neet te sprekken van de winkel van Koeleman noe.

Met old en niej ginge wiej altied naor Greutink urn carbid te halen, dat hadde wiej neudig urn ut aIde jaor uut te luuden.

Van thuus kreege wiej 'n maggiblik, want dee pasten ons ut beste. Wiej sloogen 'n gat in 'n boam van ut blik, 'n betjen carbid en spieje, 'n striekzwaevel en daor pleerden ut hen. Aw gin spieje meer hadden dan waterden wiej d'r in, maor dat mos ie good afmikken, aanders kreeg ie te volle gas met 'n grote stekvlamme as gevolg.

Nee, ut was uutkieken, afmetten en op tied de krane dichte.

13. Ie mot effen good kieken, maor dan herken ie wal 'n Maondagsdiek met 'n smal weggeke linksof naor Borculo.

Vrogger was 'n Maondagsdiek, 'n olde hessenweg, 'n belangrieke verbinding tussen onze Hanzesteden en de Pruusse.

Met de komst van de grindwege en 'n tram veranderde dat allemaole en noe is de Borculoseweg belangrieker veur ut vekeer.

Maor 'n Maondagsdiek is, wat natuurschoon en ruste betreft, nog altied 'n mooien weg, den de sfeer van waleer uutstraald.

Op disse foto is ut allemaole nog zand en boskasie, maor inmiddels bunt de rails vot, de wege vehard en van de boskasie is ok neet volle meer oaver.

De ruilvekaveling hef d'r ok neet volle goods an edaone, want zee bunt arg roe met de botte biele gengs ewes. Ut was d'r neudig, wodden d'r ezeg, ... ut zal wal.

Borculosche weg - Barchem.

14. Disse schoolfoto uut 1938 is 'enommen in de tuin van de karke. Op de achtergrond zee iej Hotel Meilink, net daor veur en achter de kinder is ut openbaar toilet veur mansleu. Ik denke dat maor weinig leu wet, dat dat ding d'r nog is. Ut is wal neet deur Berlage ontworpen, maor volgens mie mag ut wal zo langzamerhand op de monumentenlieste.

De kinder op de foto bunt, aw onderan begint: Gerrit Hogevonder, Henk Hogevonder, Gerrit Nijhof, Hanna Harkink, Rieka Harkink, Aaltje Bettink, Henk Vruggink, Gerrie Nieuwenhaver en Hendrika Schepers.

Volgende rieje: Derk Jan Dinkelman, Hendrik Jan Kamperman, Jan Nijman, Gerrit Nijman, de rieje doarachter Albert Jan Harkink, Hanna Kuenenkamp, Gerritje Harkink, Gerrie Baltes, Mineke Everink, eets leger Paultje Hoogendijk, Dientje Hiddink, Johanna Roordink, en Gerritje en Hanna Eggink. Boavenan: Janna Kuenenkamp, Derk SteenbIik, Roelof Klein Brinke en meister Van Zeben.

15. Een van de leden van Crescendo was Toone Veldink; zo'n artistiek pesoon as Toone hef Barchem neet volle ehad. Hee was 'n klein keerltje, zwarte snorre en 'n grote pette op. Hee woonde met Manna, ziene vrouwe, an 'n Karkendiek naost de zagerieje van Bannink.

Toone was huusschilder en in ziene vrieje tied maakte hee huwelijks-andenken veur 121/z-25-40 of 50 jaorige bruudsparen. Dee "kunstwarken" bunt noe nog in vescheidene boerderiejen te zeen.

Toone kwam as buurman volle bie ons, ok urn dat wiej 'n goederenstation hadden van de Gelderse Tram. En hee vreeg dan: "Bosch, is d'r veur mie nog varve of behang met 'n tram ekommen?" "Eh, nee Toone." "Nao geef mie dan maor 'n borrel."

Verder was Toone actief bie Crescendo, Toone van Manna en Jolle van Hanna leepen bie de muziek altied veurop, Toone met de kleine en Jolle met'n groten trommel.

Op 'n keer mossen ze naor 'n concours in Apeldoorn, grote straoten en an weerskanten vollek. Op 'n kruuspunt sloog ut korps in ens of, Toone en Jolle dee neet in de gaten hadden, wat 'r zich achter hunne ruggen afspolden, leepen met zien beiden allene deur.

Dat bunt van dee gebeurtenissen, dee maak ie in disse computertied neet meer met.

Op de foto, enommen veur op ut schoolplein, muziekvereniging Crescendo, naodat ze 'n eersten pries hadden ewonnen in Apeldoorn.

<<  |  <  |  1  |  2  |  3  |  4  |  5  |  6  |  7  |  8  |  >  |  >>

Sitemap | Links | Colofon | Privacy | Disclaimer | Leveringsvoorwaarden | © 2009 - 2019 Uitgeverij Europese Bibliotheek