Draejt oe is umme... Barchem in olde foto's en ansichten

Draejt oe is umme... Barchem in olde foto's en ansichten

Auteur
:   J. Bosch
Gemeente
:   Lochem
Provincie
:   Gelderland
Land
:   Nederland
ISBN13
:   978-90-288-5755-1
Pagina's
:   80
Prijs
:   EUR 16.95 Incl BTW *

Levertijd: 2 - 3 werkdagen (onder voorbehoud). Het getoonde omslag kan afwijken.

   


Fragmenten uit het boek 'Draejt oe is umme... Barchem in olde foto's en ansichten'

<<  |  <  |  1  |  2  |  3  |  4  |  5  |  6  |  7  |  8  |  >  |  >>

16. Gert Jan zeg bie ut zeen van disse ansichtkaarten: "Ie meugt blie wen, da'j nog zukke mooie ansichten hebt, dan kunt de leu van tegenswoordig zich nog 'n betjen 'n veurstelling maken hoo ut er vrogger hef uutezeene."

Ie zult wal zeggen zo'n klein darp, maor toch, d'r is alderbastend volle veranderd. Ie wilt ut allemaole wal vaste hollen, maor ut glipt oe deur de haande as los zand. Toondertied, too disse foto is enommen van boavenuut de karke, woonde in de witte boerderieje de familie Smeitink, noe wodt ut bewoond deur de familie Braakhekke. 'n Soerinkweg met ut zandpad wieterop was vrogger 'n belangrieke weg veur de leu uut Zwiep, dee naor Barchem wollen. Noe geet al ut vekeer oaver de grinte d'r urn hen.

Op de andere foto zeet uleu de malerieje en zagerieje van Reint Bannink, enommen vanof de Groene Jager in 1949. Achter de zagerieje likt de beume dee ezaagd mossen wodden en nao ut zagen, kwammen ze d'r as planken an 'n Karkendiek weer uut.

Tegen de "moUe" steet nog 'n mollensteen den ebikt mos wodden. Op de achtergrond is van de van Damstraote nog niks te zeen, ut was d'r nog allemaole boskasie met heet. Op ut huus van Riek Dijkman nao is uut disse contreien alles vot, en hef plaatse emaakt veur niejbouw.

17. Barchem was altied al arg in trek bie kunstschilders, de umgeving gaf hun volle inspiratie.

Willem van der Berg was professor an de Kunstacademie in Amsterdam. En hee kwam ieder jaor, vanof 1926, bie ons in ut hotellogeren en van daor uut ging hee volle in de umtrek schilderen.

Ok kwam hee vake met ziene leerlingen naor Barchem en een van dee leerlingen was Ko Sarneel. Op anraoden van Willem van der Berg hef mien vader urn 'n schilderieje van ut nieje hotel en zien umgeving laoten maken. Veur dee tied is ut 'n fraoi modern schilderstuk ewodden.

Ko Sarneel hef de schilderieje eschilderd in ut theehuus van Carel Stheeman. Too ut klaor was, hef Gait Jan Boom op 'n platte wagen ut geval naor ut hotel eveurd. Daor hef ut ehangen tot de verkoop van ut hotel. Noe kont uleu ut nog bekieken in ut Onderschoer, want ut is 'n schilderieje den wal wat ruumte kan gebruuken.

18. In dit huus woonde mevrouw Leopold, too disse foto enommen is. Ut was 'n prachtig huus, maor veur ene allene, fraoi an de ruume kaante. Ze heel volle van dieren en dee leepen dan ok oaveral in en urn ut huus.

Ie mosten oe neet vewonder'n, ai'j daor kwammen en ie zogen daor'n pauwe veur ut raam zitten, maor dan wal an de binnenkaante.

En wiej as kinder von den dat eggeluk helemaol neet vremd, ut pasten bie eur. Ut was 'n aardig mense, 'n betjen apart, 'n betjen excentriek, maor ik mog eur geerne.

Ze had ok mooie hazewindhunde en as ze naor ut darp mos urn bosschoppen te doone, kwam ze met 'n groot wit peerd 'n barg afstoeven met een paar van dee hun de d'r naost. In ut darp bond ze ut peerd bie ons an ut huus vaste of zetten urn bie ons in de peerdestal.

In 1947 is ze kleiner gaon wonen in ut huuske achter eur huus, en in ut grote huus is too burgemeister Loopuyt kommen wonen.

f .:-: . ;,.-

lOQttEM~

19. Ut bestuur van de olde botterfabriek "de Cloese", poseert hier veur 'n fotograaf.

Ut bunt de mansleu: Wolter Klomp, Jan Willem Dijkman, Lambert Haijtink, Jan Beltman, Hendrik Jan Lubberdink en Gerrit Jan Kok.

Zittend: Grevelink direkteur, Reint Tiessink, Jan Harkink, Hermans Kettelarij en Jan Willem Boom. Vrogger was d'r een keer per jaor in een van de cafe's, ,melkrittenanbesteden" en iedern boer, den dat wol, kon hierop metdoon. Degene dee ut leegste had in-eschreven, wodden ut melkveurn egunt. Hee mos dan iedere dag de melk ophalen van de boeren dee an ziene rit lagen en dat naor de botterfabriek hen veuren. Ie mossen wal oaver 'n goeie rugge beschikken, want ut was bes zwaor wark; Melkbussen d'r op en melkbussen d'r of.

Bie Soerink wet ik nog, kwam d'r vake, 'n busse met karnemelk terugge. Den wodden, noe pro at ik oaver zommerdage, buuten veur de schure ezet met 'n sleef d'r in, iederene den dos had, kon d'r zovolle van drinken asse wol. Karnemelk met kluutjes botter, lekkerder heb ik ut nooit ehad. Wat oaver was, wodden veur de varkens gebruukt.

20. Disse foto is wal neet stik in Barchem, maor ut viadukt, ebouwd in 1920, was veur good tramvekeer tussen Deventer en Borculo, heel belangriek.

Vrogger too ut viadukt d'r nog neet was, mos 'n tram tegen 'n Kiesak op en ut kwam regelmaotig veur datte ut neet trekken kon. Alle passagiers mosten dan uutstappen en helpen duwen, of ze daorveur dan geld terugge heb ekregen, he'k nooit eheurd.

Ai'j teurne wollen zeen, ko'j met 'n tram op 'n makkelukke maniere 'n en de vot kommen. Maor ok leu, zo as pensiongasten en Woodbrookers, dee naor Barchem wollen, maakten d'r volle gebruuk van.

Wiej hebt as kinder op de lege schole, in 1942, 'n schoolreisje met 'n tram naor 'n Platvoot in Deventer emaakt.

Dit was een van de leste reizen van 'n tram veur passagiers, daornao hef ut goederenvervoer nog 'n paar jaor deur-egaon. En jammer genog, in ut leste van 'n oorlog hebt de Duutsers ut viadukt in de log laoten vlegen. Nao 'n oorlog hebt ze met 'n hoop puun en zand ut spul glad estrekken, maor daormet was ut tramvekeer veur later ok definitief van de bane.

<<  |  <  |  1  |  2  |  3  |  4  |  5  |  6  |  7  |  8  |  >  |  >>

Sitemap | Links | Colofon | Privacy | Disclaimer | Leveringsvoorwaarden | © 2009 - 2019 Uitgeverij Europese Bibliotheek